- اتقابلنا والكلام كان بينا عادي
- بس العيون
- قالت كلام يوجع
- هي اللي بدات بالسؤال
- الفين سؤال
هي :
في عنيا ليك الفين سؤال
ليه سكت ؟
ليه وافقت ولية بدات ؟
وليه زعلت ؟
وليه مشيت .... ولية رجعت ؟
وليييه نهيت
وسؤال كمان ...خلاص نسيت
م البداية حبي كان باين عليا
وما التفتش
بس انت شوفته
وقولتلي ان انت شوفته
لية سكت ؟
كَلمتك
كِلمتي كانت باينه عادي
وكِلمتك كانت طالعه عادي
وفي عنيا نظرة الشوق اللي تدبح .. حس بيا
خدت رقمي وخدت رقمك
ليه وافقت؟
كَلمتني
وسمعت صوتك
وكتمت صوت فرحي ف ضلوعي لاتسمعه
بس صوتك بان علية
قولتهالي
وقولتهالك
كلمة الحب اللي ياما حلمت اني اسمعها منك
قولتهالى
وقولتهالك
ليه بدات ؟
وعرفت عني كل حاجه
واما بحكي في اللي فاتني قبل منك
ألاقيك سكتّ
حاسة صمتك
حتي صمتك يومها قالي انك زعلت
مكانتش غيره
قولي طيب لية زعلت ؟
واتواعدنا واتعاهدنا
وبنيت كل احلامك معايا
وعشقتني
وعشتني
وفرحت بيا
مش ده كلامك
يا دنيتي وفرحتي
واجمل ما فيا
والاقيك مشيت
"يا فرحتي"
من غير سبب تمشي عشانه
الاقيك رجعت بدون سبب
لية مشي ولية رجعت ؟
المهم انك رجعت
انسي اللي فات خلاص انا نسيتة
والمهم انك واحشني
وحشتني منك كلمة وحشتيني وبحبِك
وحشني سؤالك عن لبسي ومكياجي
"خرجتي النهارده.. روحتي فين"
علي فكره ما خرجتش
ما لقيتش حد استاذنة في بعدك
ما انت عارف ...
قولها يلا
قولي كلمه من كلامك
قولي حتي شعر م اللي كتبته فيا
ليه طال سكاتك
بتحبني..؟
جاني ردك شئ غريب
ما قدرش عقلي يفهمه
ولا حتي قلبي استوعبه
"اعزوريني حبي قل"
ليه نهيت ؟
انا:
اسمعيني
صحيح انا الظالم وانا القاسي
وسبتك -- خنت احساسي
وانا اللي ياما اتحاكيت
بحبي -- لأ واخلاصي
بس اعمل ايه
شوفيلي حل
دا جرحي اني باجرحك
وحلمنا وانا بسحبه
حسيت كاني باقتلك
وقلبي اللي كان بيرسمك
دلوقتي هوه
هوه نفسه بيقسمك
بس اعمل ايه
شوفيلي حل
لما لقيت ماضيكي هل
ولاقيت كلام غير الكلام
ولاقيت الام غير الالام
وفي حاجات وذكريات ما كانوش تمام
شوفيلي حل
ماكنش جرحك عندي سهل
ولا كان بايدي غير اني اسيبك
واني اقولك
اعزوريني حبي قل
بس اسمعيني
يا اللي مجروحه ف كيانك
انا القلب اللي علاكي وبناكي
وبقيتي ويايا
وعرفتي ويايا
ايه معني الحبيب
وبقيتي نجمة ف السما بتزيد .. لهيب
وحرقتي نفسك وانتي بتداري الحقيقة
وحاولتي عنها تبعدي
بمليووووووون طريقة
وانتي عارفه ايه حقيقتك
فما تكدبيش ع الناس
وترسمي في العين برائتك
الناس دي عارفاكي
انا اللي معرفكيش
مثلتي عليا حياكي
وطلعتي في الاخر ... مفيش
وجاية تحكي في إيه
جاية تحكي في إيه
وبعد فراقنا بيومين
شوفتي خلاص غيري
ومشيتي معاه ف حيى
خليه ينسيكي ظلمى
ده لو هيعرف يعشقك .. زيى
