الأربعاء، 8 ديسمبر 2010

حسسيني 4 اجزاء



حسسيني

حسسيني انك عشاني
حسسيني ان أنتى راجعه فيا تاني
حسسيني ان أنتى راجعه محتاجه لحناني

حسسيني ان أنتى هيه
اللي نفسي فيها ليا
اللي نفسي أعيش معاها
أديها عمري
وتبقي هيه روحي فيا

حسي بيا لما أفرح
حسي بيا لما أبكي
وامسحي دمعه عنيه

دمع عيني مش بينزل .... وأما ينزل
صعب تمسح فيه إديا
مش بيخلص .. مهما بامسح فيه بكمي
كوني ليا برده أمي
حضن دافي يخف همي
هابقي صاحبك وابقي أخوكي وابقي أبوكي

مش حنان الأب فيا
بس عادي ان ابقي ليكي وتبقي ليا
كل حاجه
قولي حاجه
قولي ليا كل حاجه

قولي ليا ان إحنا واحد ولا  لأه
قولي كارهه ولا عاشقه
صعب اقبل
نكون مجرد اتنين جوه شقه
حسسيني انك عشاني
وحسسيني الحب فيكي
حسسيني يا حبيبه اني اقرب حد ليكي
********
وكان ردها
******
صعب جدا
صعب جدا اني اقولك
اني عشقاك انت كلك
عاشقه صوتك عاشقه صورتك
عاشقه كل كلام في سيرتك
عاشقه كل كلام تقوله
بافضل احلم يوم بطوله
اني اقابلك
 اني اكمل عمري جنبك
.. خايفه يوم تجيني فيه
ملاقيش حبيبي
اللي ياما حلمت بيه
اللي ياما قال كلام وقال وعود
اللي قالي هخاف عليكي
وكل دول عليك شهود
صعب جدا رغم حبي اني ابقي ليك
 صعب جدا يا حبيبي 
ابقي جاريه ما بين اديك

***
طب حسسيني
حسسيني ان انتي انثي
حسسيني ان انتي بنت تدوب بهمسه
تدوب بلمسه
حسسيني ان انتي فيكي قلب لسه
حسسيني ان انتي مش راجل قصادي
اقول يمين تقولي لأه م الجهادي
انا بس عايزك تبقي عادي
بنت .. عادي
انثي .. عادي
انتي جامده انتي موزه
بس ناقصك يبقي فيكي طبع انثي
هي الانوثه تتوصف
غير بحضن
ويا رقه
وتبقي اطري م الزبادي
انا بس عايزك تبقي عادي

******
وبعد الفراق كان اللقا
*******

حسسيني
حسسيني بخوف سنيني
حسسيني ان انتي جايه تقتليني
حسسيني ان اللي بينا مكانش حاجه
وكنت بلعب ... دوخيني
حسسيني انك كسبتي
خسرتي بيا وبيه ... كسبتي
عايزاني اقول .. اه يالهوي دي مصبتي
حطي خيبتك جنب خيبتي
تعالي وابكي في حضني يا اختي
طلع ندل مالوش امان
.. مش الصفات دي فيكي انتي؟
هتحطي همك جنب همي ؟!
لا كنت ابوكي ولا كنتي امي
ولا كنا يوم اتنين حبايب
قولتي بحبك؟
.. يمكن كنت يوميها غايب
فكرت فيكي ؟
.. ما انا كنت يا اختي ساعتها خايب
.. ودلوقتي بس بقيت حبيبك !!
ده حب من باب الشحاته
لوتشكي تسمعي ضحكي بيعلا
هههههههههاي
ودي ضحكه من باب الشماته

ليست هناك تعليقات:

إرسال تعليق